SABAQ 5 Riwayat ko Sehat KE aitbar se iqsam Sahih Lezatihi

SABAQ 5 

Riwayat ko Sehat KE aitbar se iqsam

Pichle Sabaq me humne Tadad e Sanad ke Aitbar se Hadees ke Iqsam padhe ab Riwayat ko Sehat ke Aitbar se Iqsam Padhenge

Kisi Riwayat ke Sehat ke Aitbar se 4 Iqsam hote hai

1. Sahih
2. Hasan
3. Zaeef
4. Mauzu

Phir inme har ek ke apne kuch iqsam hote hai woh aage bataya jayega apne Maqam par InshaAllah

Sahih Hadees ke 2 Iqsam hai

1. Sahih Lezatihi
2. Sahih Leghairihi

Sahih Lezatihi ki Tareef (Defination)

Jis Riwayat ke Sabhi Rawi Aadil, Zabit ho. Sanad Mutassil ho yani Musannif se Lekar Nabi صلى الله عليه وسلم tak sare rawi ek dusre se jude hue ho koi rawi bich se saqit na ho aur Hadees ka Matan Gair shaaz ho Yani koi Rawi kisi  Dusri Hadees ke Behtar rawi ki Mukhalifat na karta ho. Aisi Hadees Sahih Lezatihi Hogi

Adil Rawi Kaun Hai?

Rawi Nek Muttaqi Imandar ho. Kisi fisq-o-Biddat me uska naam shamil na ho

Zabit Rawi Kaun Hai?

Hadeeso ko itne achche se zabt kiya ho ki jab chahe bayan kar de bila kisi rukawat ke.

Rawi Saqit na ho matlab?

Sanad me jis tarah rawiyo ke naam tarteeb se likhe ho unki aapas me Mulaqat sabit honi chahiye. 

Agar Mulaqat sabit nahi hai to wo ek dusre se usuli taur pe sanad me jud nahi sakte. to aise me jab zaid ne amru se mulaqat kiya hi nahi to usse hadees zaid ko kaise mili? Apas me Mulaqat na hone ki kai wajah ho sakti hai

1. Dono Rawi Alag alag Mulk ke ho aur kabhi ek dusre ke mulk jane ka ittefaq nahi hua.
2. Amru ka inteqal 50 hijri me hua aur Zaid ki Paidaish hi 51 hijri me ho to bhi kaise mulaqat ho sakti hai? 

Aisi aur bhi wajuhat hai jo aage Bahes ke Maqam par Bataya jayega

Rawi Saqit nahi hai = Sanad judi hui hai, Mutassil hai.

Rawi Saqit hai = Sanad tuti hui hai Mutassil nahi hai.

aur gayab rawi kaun hai hame nahi pata to yeh bhi nahi pata ki wo sachcha hai ya jhuta, Adil, zabit hai ya kamzor. Is bina par woh hadees Mashkook ho gayi jisme koi rawi gayab hai. to woh hadees zaeef kehlayegi.